Sunday, 26 October 2014

Il-Vici Prim Ministru Dr Tonio Borg f'laqghat mal-President Tunezin

Published on 20-Mar-2012Print this Article

 

Il-Viċi Prim Ministru u Ministru tal-Affarijiet Barranin Dr Tonio Borg kellu laqgħat bilaterali mal-President tar-Repubblika tat-Tuneżija Moncef Marzouki, waqt żjara uffiċjali li qed iwettaq fit-Tuneżija. Dr Borg huwa l-ewwel membru tal-Gvern Malti li kellu laqgħat mal-Gvern il-gdid Tunezin.

 

Din hija t-tieni zjara mill-Ministru Borg f’dan il-pajjiż wara li seħħet ir-rivoluzzjoni f’Jannar tas-sena 2011, l-ewwel żjara tal-Viċi Prim Ministru wara r-rivoluzzjoni seħħet fi Frar tas-sena li għaddiet.

 

Waqt id-diskussjonijiet, il-Viċi Prim Ministru Dr Tonio Borg faħħar il-progress li qed isir biex it-Tuneżija tissaħħaħ fil-mixja demokratika li bdiet is-sena li għaddiet. Huwa offra l-għajnuna ta’ Malta f’diversi oqsma, speċjalment dawk marbuta mal-edukazzjoni u s-saħħa.

 

Dr Borg qal li Malta lesta li toffri mir-riżorsi limitati tagħha l-għajnuna li tista’ biex tgħin lil poplu Tuneżin. Semma l-boroż ta’ studju li qed jiġu offruti fil-qasam tat-tagħlim tal-lingwa u fil-MEDAC. Qal li diġa hemm numru ta’ studenti u uffiċjali pubbliċi Tuneżini li qed igawdu minn din l-inizjattiva.

 

Intant, il-Viċi Prim Ministru Dr Tonio Borg qal li Malta bħala membru fl-Unjoni Ewropea, u b’vokazzjoni Mediterranja, qed tagħmel ħilitha kollha biex issemma leħen it-Tunezija fil-fora Ewropej.

 

Minn naħa tiegħu, il-President tat-Tuneżija, Moncef Marzouki irringrazzja lil Dr Borg tal-ħbiberija li qed juri pajjizna. Faħħar l-avvanzi kbar li għamlet Malta f’diversi oqsma fosthom dawk marbutin mas-settur finanzjarju. Is-Sur Marzouki kompla jgħid li Malta u t-Tuneżija jistgħu isibu diversi oqsma inkomuni li fihom jistgħu jimirħu.

 

Il-President Tuneżin faħħar l-inizjattiva ta’ Malta li qed tippropni li jsiru summits kull sentejn bejn l-Unjoni Ewropea u l-pajjiżi Għarab, huwa qal li jappoġġja din il-proposta u jħares il-quddiem biex din issir realtà.

 

Il-Viċi Prim Ministru Dr Tonio Borg kellu laqgħat ukoll mal-President tal-Assembleja Kostitwenti Mustafa Ben Jaafar u iktar tard illum kellu  taħditiet bilaterali mal-Ministru tal-Affarijiet Barranin Tuneżin Rafik Abdessalem.

 



Back to list
spacer
 
This website uses flash animation. Download flash player for free by clicking here.
This website requires PDF Reader technology. Install the PDF Reader to view.
GOV.MT DOI
Designed by Liquid Studios Ltd.
Powered by FlexiPort
Ver 1.0.4787